FREQUENTLY ASKED QUESTIONS

Hues du schonn eemol erlieft, dass ee Frënd oder eng Frëndin, ee Klassekomerod oder eng Klassekomerodin, oder een anere Jugendlechen, deen s du vläicht mol net kenns, vun anere Jonken ugegraff oder geschloe gouf? Waars du vläicht souguer scho selwer Affer vu Gewalt?

Esou Iwwergrëffer sinn eng Strofdot. Si kënne mat héije Geldstrofen oder, ofhängeg dovun, wéi schlëmm d'Dot war, souguer mat Prisong bestrooft ginn. Zousätzlech kann d'Affer iwwert d'Geriicht Schmäerzensgeld vum Täter fuerderen. Op den Täter/d’Täter kënnen och nach aner Konsequenzen duerkommen, wéi zum Beispill ee Schoulverweis oder d'Beschlagnamung vum Handy.

Dacks kënnt nach dobäi, dass Zeien d'Dot filmen an dee Video dann un anerer viruschécken oder an de soziale Medien deelen. Dat mécht d'Situatioun fir d'Affer och no der Dot natierlech nach schlëmmer. Esou Videoen ze maachen an ze verbreeden ass dowéinst och verbueden. Och hei riskéiert een ënner anerem eng Geldstrof. Iwweregens: Dat gëllt och fir d'Viruschécken oder Deele vun esou Videoen, déi een net selwer gefilmt huet, mee déi ee vun anere geschéckt kritt huet.

Amplaz bei engem Iwwergrëff, bei deem Gewalt ugewent gëtt nozekucken, sich onbedéngt Hëllef, ouni dech selwer a Gefor ze bréngen. Well just wann s du Hëllef frees, zum Beispill bei der Police, kann och eppes gemaach ginn. Wéi genau dat funktionéiert, kanns du hei noliesen (Rubrik Zeien). Wien net hëlleft, riskéiert sech iwweregens der sougenannter “ënnerloossener Hëllefsleeschtung” schëlleg ze maachen.

Natierlech sollt een ëmmer probéieren, sech net a Gefor ze bréngen. Wann sech allerdéngs eng geféierlech Situatioun ukënnegt an onvermeidbar schéngt, da solls du onbedéngt direkt d'Police um 113 uruffen. Wann s du keng Méiglechkeet hues ze telefonéieren, da maach d'Leit ronderëm op dech opmierksam a ruff ëm Hëllef. Am Beschte schwätz du eng Persoun direkt mam Numm un oder riffs zum Beispill: “Du, mam bloe Pullover, ruff d'Police”.

D'Police ass dofir do, fir dir ze hëllefen, wann s du a Gefor bass. Wann s du den Noutruff 113 wiels, kënnen d'Polizisten a Polizistinne bannent kierzter Zäit do sinn an agräifen.

Du bass net eleng! Et gëtt vill Leit, déi dir hëllefe wëllen. Allerdéngs geet dat nëmmen, wann se och Bescheed wëssen, datt eppes ass. Et ass dofir wichteg, dass du dech un eng Vertrauenspersoun riichts an dech hir uvertrauts. Dat kënnen deng Elteren, Frënn, d'Léierpersonal oder de Service psycho-social et d'accompagnement scolaires (SePAS) an denger Schoul sinn oder eng aner erwuesse Persoun, déi s du kenns an där s du vertraus.

Fir dass eppes géint den Täter/d'Täter ka gemaach ginn a Schrëtt an d'Weeër geleet kënne ginn ass et ausserdeem wichteg, dass d'Police informéiert an eng Plainte gemaach gëtt.

Falls et ee Video vum Ugrëff gëtt, da späicher deen a weis en der Police - e kann nämlech ee wichtegt Beweismëttel sinn.

D'Police ass do, fir dir ze hëllefen. D'Polizisten a Polizistinne kennen sech genau aus a wëllen, dass dir an och anere Jugendlechen an Zukunft keng Gefor méi dreet.

Wann s du ugegraff gi bass, kanns du dech ëmmer un d'Police um 113 riichten. Hei kanns du zu all Auerzäit ee Mataarbechter oder eng Mataarbechterin vun der Police erreechen, deen oder déi dir dann déi weider Demarchen erkläert.

Dat muss du natierlech net eleng maachen. Du kanns d'Police och zesumme mat dengen Elteren, Frënn, mat engem Member vum Léierpersonal oder enger anerer Vertrauenspersoun kontaktéieren.

All d'Informatioune mussen an enger offizieller Auditioun festgehale ginn. Dofir gëtt ee Rendez-vous mat der Police ausgemaach. Bei dësem Treffe stellt d'Police dir dann eng Rei un Froen, wéi zum Beispill:

• Wat ass genau geschitt?
• Wou a wéini ass et geschitt?
• Wéi vill Täter waren et?
• Wéi hunn d'Täter ausgesinn?
• Weess du, wien et war oder kenns du Persounen, déi mat dem Täter/d'Täter befrënnt sinn?
• Wee war nach do? Gëtt et Zeien?

Virun dengen Ae gëtt ee Jugendlechen ugegraff. Wat maachen? Elo gëllt et ze handelen, awer ouni dech selwer a Gefor ze bréngen. Mell dech direkt bei der Police um 113. Bannent e puer Minutte kënne Polizisten a Polizistinnen do si fir ze hëllefen. Wann s du keng Méiglechkeet hues, fir selwer ze telefonéieren, da kanns du och een anere froen, fir dat ze maachen.

Ausserdeem wier et gutt, wann s du dir esou vill Informatioune wéi méiglech iwwert den oder d'Täter verhäls, zum Beispill wéi hien oder si ausgesinn. Dës Informatioune kënne fir d'Police herno nëtzlech sinn.

Nëmme wann s du eppes méchs, kann dem Affer gehollef ginn.

Een Ugrëff mat Gewalt ka fir d'Affer schwéier a laangfristeg Follgen hunn. Nieft kierperleche Verletzunge geet et der Persoun och emotional a mental net gutt an si fillt sech warscheinlech verängschtegt, erniddregt an traureg.

Wann eng Frëndin, ee Frënd oder een aneren sech un dech riicht an dir uvertraut, wat geschitt ass, dann ass et wichteg, dass du hir oder him nolauschters a versichs, si oder hien ze ënnerstëtzen. Rot hir oder him, d'Police ze kontaktéieren. Dëst kann een entweder bei de verschiddene lokale Policebüroen (police.public.lu) oder iwwert den 113 maachen. Dir kënnt dat och zesumme maachen oder du informéiers d'Police selwer. Du kanns natierlech och engem Erwuessenen, zum Beispill dengen Elteren, dem Léierpersonal oder enger anerer Vertrauenspersoun Bescheed soen oder si ëm Hëllef froen.

Vläicht kenns du d'Affer och guer net perséinlech, mee hues nëmme vum Ugrëff héieren oder ee Video dovunner gesinn. Wann s du an engem Video vun der Dot eng Persoun erkenns oder souguer perséinlech kenns, da mell dech bei der Police. Nëmme sou kann dem Affer gehollef an den oder d'Täter gefaasst ginn. Späicher de Video, fir der Police en ze weisen.

Wann s du keen am Video kenns, da verbreet en net weider, mee läsch en. Maach och d'Persoun, déi dir de Video geschéckt huet drop opmierksam, dass een dat net dierf. D'Filmen a Verbreede vu Biller vun esou Iwwergrëffer ass nämlech verbueden! (Rubrik “Gewalt ass strofbar”). Dat gëllt och fir d'Weiderschécken oder d‘Deele vun esou Videoen, déi een net selwer gefilmt huet, mee déi ee vun anere geschéckt krut.

D'Police ass do fir ze hëllefen. D'Polizisten a Polizistinne kennen sech genau aus a wëllen, dass dem Affer, awer och anere Jugendlechen, an Zukunft keng Gefor méi dreet.

Wann s du vun engem Ugrëff matkritt hues, kanns du dech ëmmer un d' Police um 113 wenden. Hei kanns du zu all Auerzäit eng Mataarbechterin oder e Mataarbechter vun der Police erreechen, déi/deen dir dann déi weider Demarchen erkläert.

Du muss dat natierlech net eleng maachen. Du kanns och mat dengen Elteren, Frënn, engem Enseignant oder enger anerer Vertrauenspersoun zesummen d'Police kontaktéieren.

All d'Informatioune mussen an enger offizieller Auditioun festgehale ginn. Dofir gëtt ee Rendez-vous mat der Police ausgemaach, bei deem d'Police dir dann eng Rei Froe stellt. Zum Beispill:

• Wat ass genau geschitt?
• Wou a wéini ass et geschitt?
• Wéi vill Täter waren et?
• Wéi hunn se ausgesinn?
• Weess du, wien et war oder kenns du Persounen, déi den oder d‘Täter kennen?
• Wie war nach do? Gëtt et nach aner Zeien?

Mee och wann s du déi Saachen net all weess, zéck net, dech bei der Police ze mellen, well nëmmen esou kann eppes géint den Täter/d'Täter ënnerholl ginn. Wann d'Police all déi noutwenneg Informatioune vun dir huet, kënnen zum Beispill Ermëttlunge géint d'Täter ageleet ginn.

Gewalt ënner Jugendlechen, bei där jugendlech Täter et op een oder méi Affer ofgesinn hunn, ass keen neien, duerfir awer Phänomen, deen sech reegelméisseg widderhëlt. Et muss heibäi keng Verbindung oder Virgeschicht tëschent Täter an Affer ginn – d'Affer kënne komplett zoufälleg ausgewielt sinn.

Oft gëtt d'Affer net nëmme blesséiert, mee zousätzlech dozou och nach gefilmt. Duerno ginn d'Opnamen ënnert de Jugendleche weidergeleet, wat niewent grave psycheschen Auswierkungen op d'Affer och negativ Auswierkungen op aner Jugendlecher kann hunn, déi ëmmer rëm mat esou Biller konfrontéiert ginn. Aus deem Grond erënnere mir drun, dass d'Ophuelen an d'Verbreede vun esou Videoe verbueden ass. (Rubrik “Gewalt ass strofbar”) Dat gëllt och fir d'Weiderschécken an d'Deele vu Videoen, déi een net selwer gemaach huet, mee déi ee vun anere geschéckt krut.

Huelt Iech all Dag Zäit, fir mat Ärem Kand ze schwätzen. Et ass wichteg, dass Äert Kand weess, dass et zu all Ament seng Gedanken, Erliefnesser, Gefiller a Suerge mat Iech deele kann. Respektéiert a berouegt Äert Kand, wann et Iech vu schlechten Erfarungen a schwéiere Momenter aus sengem Alldag erzielt. Dat mécht et Ärem Kand méi einfach, Informatioune mat Iech ze deelen a seng Erfarungen auszetauschen.

Ausserdeem ass et wichteg, dass Äert Kand weess, wéi et sech an enger geféierlecher Situatioun oder am Fall, wou et Zeie vun enger Aggressioun gëtt, ze verhalen huet.

• Beschwätzt zesummen, dass et wichteg ass, dass Äert Kand direkt iwwert den 113d'Police alarméiert, wann eng akut Bedroung oder Gefor besteet, sief et fir sech oder fir anerer.
• Erkläert Ärem Kand, dass et wichteg ass ze hëllefen, ouni sech selwer a Gefor ze bréngen. D'Police oder d'Léierpersonal ze informéieren ass scho gehollef.
• Nëmme wann d'Police informéiert ass, ka si agräifen. Erkläert Ärem Kand, dass d'Police do ass fir ze hëllefen. Äert Kand kann dozou bäidroen, datt eppes géint d'Täter kann ënnerholl ginn a weider Aggressioune kënne verhënnert ginn.

Wann Äert Kand vun enger méiglecherweis geféierlecher Situatioun erzielt, da probéiert fir d'éischt roueg ze bleiwen an Äert Kand ze berouegen. Weist him, dass et elo a Sécherheet ass, lueft Äert Kand fir seng Éierlechkeet an dofir, dass et sech Iech uvertraut huet, a maacht him op kee Fall Virwërf.

Wann Äert eegent Kand ugegraff gouf, kontaktéiert esou séier wei méiglech e Policebüro vun Ärem Choix (police.public.lu) fir eng Plainte ze maachen. Erkläert Ärem Kand, dass d'Police do ass fir ze hëllefen a wéi ee Gespréich mat der Police ofleeft. Informatiounen dozou kënnt Dir hei (Rubrik „Du bass...“ – Onglet „Affer“) noliesen oder op dem Internetsite vun der Police ënnert dësem Link (police.public.lu). Sollt esou ee Virfall am Ëmfeld vun der Schoul geschitt sinn oder ee Matschüler involvéiert sinn, dann informéiert och d'Direktioun vun der Schoul. Falls et ee Video gëtt, da späichert e fir en der Police als Beweismëttel zur Verfügung ze stellen.

Wann net Äert eegent Kand, mee een anert Kand Affer vun esou engem Virfall ginn ass, da sicht d'Gespréich mat den Eltere vum betraffene Kand, falls Dir se kennt, a rot hinnen, d'Police ze kontaktéieren. Informéiert zousätzlech d'Léierpersonal, wann de Virfall mam schouleschen Ëmfeld ze dinn huet. Natierlech kënnt Dir Iech och selwer bei der Police mellen.

Wann eng akut Gefor, Menace oder soss eng Urgence besteet, dann alarméiert d'Police direkt um 113.